Muslim Saleem ...9 October 2018 Jo muddat baad pesh e aaina hoon

Muslim Saleem ...9 October 2018
Jo muddat baad pesh e aaina hoon
Main apne aap se kaafi juda hoon
Main sheeshe ka bayan jhutlaaoon kaise
Idhar main hoon udhar saaya dikha hoon

MUSLIM SALEEM - 10 OCTOBER 2018 JAB ANDHERE MAIN WO CHHAT PE AATI NAHEEN

MUSLIM SALEEM - 10 OCTOBER 2018
JAB ANDHERE MAIN WO CHHAT PE AATI NAHEEN
CHANDNI BHI KAHEEN MUSKURATI NANEEN
US KE RUKH SAY PALAT KAR JO JAATI NAHEEN
AASMAN PAR DHANKAK RANG PAATI NAHEEN
KOI AAYA HAI SEHN E GULISTAN MAIN
WARNA BAAD E SABA GUNGUNATI NAHEEN
MUTTALA KHAIRIYAT SE JO KAR DETE TUM
GHAM GHULAATA NAHEEN FIKR KHATI NAHEEN
SHAMIYANA SITARON KA BAY-NOOR HAI
BIN TIRE YE FAZA JAGMAGATI NAHEEN

MUSLIM SALEEM - REHZANI RAAHBAR HO GAYEE HAI

MUSLIM SALEEM - 4 OCTOBER 2018
REHZANI RAAHBAR HO GAYEE HAI
YE PURANI KHABAR HO GAYEE HAI
JAB SAY UNKI NAZAR HO GAYEE HAI
HAR DAWA KARGAR HO GAYEE HAI
BAY-BASI PUR-ASAR HO GAYEE HAI
BAY-KASI CHARAGAR HO GAYEE HAI
JAB SAY BADLI HAI AADIL KI NEEYAT
HAR KHATA MU'TABAR HO GAYEE HAI
AAGE AANI HAI WAADON KI DALDAL
RAAH AB PUR-KHATAR HO GAYEE HAI
AAPKA SAATH PAAYA TOU JAISE
RAUSHNI HAMSAFAR HO GAYEE HAI

MUSLIM SALEEM - SCIENCE SE HAQEEQAT E BISMIL KO DEKH LAY

MUSLIM SALEEM - 22 September 2018
SCIENCE SE HAQEEQAT E BISMIL KO DEKH LAY
POSHEEDA CAMERE SE MIRE DIL KO DEKH LAY
INSAF O ADL KARNA DILERON KA KAAM HAI
ZALIM KO DEKHNA HAI TOU BUZDIL KO DEKH LAY
RAHON MAIN JIS NAY KHAR BICHAAYE QADAM QADAM
AB KHUD SHIKAST KHURDA HAI, MANZIL KO DEKH LAY
IZHAR E HAQ HAI EK BADA JURM AAJKAL
MUNH KHOLNAY SAY PEHLE SALAASIL KO DEKH LAY
KYUN AUR KAISE HOGA QAYAMAT KAY BAAD HASHR
GAR DEKHNA HAI, YAR KI MEHFIL KO DEKH LAY

MUSLIM SALEEM - HINDUSTAN KI VEERAN MASAAJID KO DEKH KAR EK TAASSUR

MUSLIM SALEEM - HINDUSTAN KI VEERAN MASAAJID 
KO DEKH KAR EK TAASSUR - 20 SEPTEMBER 2018
KAR KAY KITNI MASAAJID KO VEERAN GAYE
HINDUSTAN KO CHHOR KAY PAKISTAN GAYE
MASNAD, DAULAT AUR JANON KI QEEMAT PAR
TEEN KE SHEDON MAIN BAN KAR MEHMAN GAYE
QUAM ILAAQE SE HOTI HAI, DEEN SAY NAHEEN
BAN KAY MUHAJIR, QAUMON KO PEHCHAN GAYE
MAALIK NAY TOU BAKHSHA THAA KUL MULK HAMAIN
KIS KAY DAR SAY SHAIKH AUR MUGHAL PATHAN GAYE
AAJ BHI HINDUSTAN MAIN MUSLIM ZINDA HAI
TUM GHABRA KAR DIL MAIN LIYE HAIJAN GAYE

BEGUMSARAI MASJID, DELHI PICTURE COURTESY
‎Masroor Hasan Siddiqi‎

MUSLIM SALEEM - 13 SEPTEMBER 2018 (nazr e Imam (AS)

MUSLIM SALEEM - 13 SEPTEMBER 2018 (nazr e Imam (AS)
KIRDAR MAIN GHULAY GI SHABAHAT HUSSAIN (AS) KI
DIL MAIN BASAA KE DEKH MAHABBAT HUSSAIN (AS) KI
IMAAN KI BAQAA HAI SHAHADAT HUSSAIN (AS) KI
RAKKHEN GE HAM BACHA KE YEH DAULAT HUSSAIN (AS) KI
DHUNDHLI NAHEEN PADEGI AQEEDAT HUSSAIN (AS) KI
ISLAM PAR CHARHI HAI WO RANGAT HUSSAIN (AS) KI
MAA'IL BA HUKM E RAB THI TABEE'AT HUSSAIN (AS) KI
SAJDE MAIN SAR KATAANA THI RAHAT HUSSAIN (AS) KI
HAQ GOI, HAQ PARASTI THI FITRAT HUSSAIN (AS) KI
MUSLIM TUJHAY MILI HAI QARAABAT HUSSAIN (AS) KI