Barqi Azmi - tarhi do ghazla

انحراف ادبی فورم کے مشاعرے بتاریخ ۲۴ اگست ۲۰۱۲ کے لئےاحمد علی برقی اعظمی کی کاوش

 

 ہمیشہ کہتا تھا اپنی جو جانِ جاں مجھ کو

نہ جانے چھوڑ کے اب وہ گیا کہاں مجھ کو

 مری رقیبوں کی صف میں مجھے نظر آیا

وہی جو دیتا تھا جھوٹی تسلیاں مجھ کو

 دیارِ شوق میں جن کو تلاش کرتا تھا

نہیں ملے کہیں قدموں کے وہ نشاں مجھ کو

 ہے جس کو بارِ سماعت ہر ایک بات مری

ابھی بھی یاد ہے  اُس کی وہ ہاں میں ہاں مجھ کو

 کلامِ میر و جگر سن کے ایسا لگتا ہے

سنا رہے ہیں مری ہی وہ داستاں مجھ کو

 نقوش ثبت مری لوحِ دل پہ پیں اُن کے

بہت عزیز ہے یہ یادِ رفتگاں مجھ کو

 جسے سمجھتا تھا اپنا وہ غیر کا نکلا

’’بطورِ خاص ملا سوزِ جاوداں مجھ کو‘‘

 دوسری کاوش

کوئی بتائے مجھے میرا آشیاں مجھ کو

دکھائی دیتا ہے ہر سو دھواں دھواں مجھ کو

 جنھیں سکھایا تھا بچپن میں بولنا میں نے

سمجھ رہے ہیں وہی آج بے زباں مجھ کو

 کھٹک رہا ہے نشمین مرا انھیں شاید

دکھا رہی ہیں یہ کیوں آنکھ بجلیاں مجھ کو

 سکوتِ شب میں ہے ہر سو مھیب سناٹا

سنائی دیتی ہیں کس کی یہ سسکیاں مجھ کو

 ہمیشہ تختۂ مشقِ ستم رہا ہوں میں

’’بطورِ خاص ملا سوزِ جاوداں مجھ کو‘‘

 کبھی جو رونقِ گلشن تھیں فصلِ گُل میں آج

کہیں نظر نہیں آتیں وہ تتلیاں مجھ کو

 ہمیشہ ساتھ تھا برقی مرے مرا ہمزاد

جدھر جدھر وہ گیا لے گیا وہاں مجھ کو